وريثة المنصوري - المقدمة

إمضي يا ليلى ، ووفّري على نفسك الفضيحة...!ارتطم الملف الأسود بالطاولة الزجاجية، فتناثرت بعض الأوراق على الأرض، بينما ارتفع صوت فؤاد المنصوري داخل قاعة الاجتماعات الفاخرة، معلنًا انتهاء صبره.

رفعت ليلى  عينيها إليه، ثم ابتسمت ابتسامة باردة جعلت ملامحه تتصلب :-

-  فضيحة إيه يا عمي؟ إن بنت أخوك ترجع تاخد حقها؟ ولا إن الناس تعرف إنت عملت إيه بعد موت أبويا.... ؟

وبينما كان مروان فؤاد المنصوري يتابع المشهد بانتباه ، مستندًا إلى مقعده الجلدي، وقد انعقد حاجباه بانزعاج واضح.

ضرب فؤاد كفه على الطاولة :-

-  إنتِ شكلك نسيتي نفسك... ! إنتِ داخلة شركة المنصوري، مش داخلة بيت أبوكي... !

التفتت ليلى إليه ببطء :-

- الشركة دي كانت بتاعة أبويا قبل ما حضرتك تحط إيدك عليها ولو نسيت، أنا معايا أوراق تثبت كل كلمة بقولها.

أخرجت ليلى مستندًا من حقيبتها، ووضعته أمام عمها :-

-  قبل ما أخرج من القاعة دي، عندي سؤال واحد يا عمي… عايزة أفهم إزاي أبويا تنازل عن حصته المسيطرة في مجموعة المنصوري لصالحك، بموجب مستند مؤرخ بعد وفاته بثلاثة أيام!

نهض مروان من مقعده، وسحب الورقة قبل أن يتمكن والده من الوصول إليها. ألقى عليها نظرة سريعة، ثم رفع عينيه إلى ليلى :-

- إنتِ جبتي الورق ده منين.... ؟

انتزعت الملف من يده :-

- مش من حقك تسألني.

-  أنا بسألك سؤال، ردي عليه... !

- وأنا مش ملزمة أرد عليك.... !

اقترب مروان  منها ونطق بنبرة حادة وغضب :-

- واضح إنك جاية تعملي مشكلة، بس شكلك مش فاهمة إنتِ بتلعبي مع مين.

رفعت رأسها بتحدي :-

- فاهمة كويس. بلعب مع ناس افتكروا إن موت أبويا فرصة ذهبية عشان يسرقوا بنته.

اشتعلت عيناه غضبًا :-

-  خدي بالك من كلامك!

-  وإنت خليك في حالك. أنا مش البنت اللي كنت بتعرف تسكتها بكلمتين زمان.

رفع فؤاد رأسه أخيرًا، وحدق في ليلى بنظرة لم ترَ مثلها في حياتها :-

-  إنتِ فاكرة إن الورقتين دول هيخلّوكي تاخدي حاجة؟ إنتِ مش عارفة حاجة عن اللي حصل لأبوكي... !

تسارعت دقات قلبها وهتفت بغيظ مكتوم  :-

- أمال مين اللي يعرف؟ إنت؟

نهض فؤاد بعنف، فاصطدم مقعده بالطاولة :-

- اخرسي.... !

لكن ليلى لم تتراجع :-

-  لأ، مش هسكت! أبويا مات، وأنا حتى ما لحقتش أودعه. ولما رجعت، لقيتكم قسمتوا كل حاجة بينكم كأنه مكنش ليه بنت عايشة على وش الدنيا!

التقط  مروان الملف مرة أخرى واخذ يمعن النظر فيه مجددًا  ثم نظر إلى والده باستفهام :-

-  بابا… ايه اللي بيحصل... ؟!

تدخل فؤاد بحدة :-

- اقعد يا مروان ومتدخلش نفسك في حاجة إنت مش فاهمها.

ضحكت ليلى بمرارة :-

-  أهو ده اللي أنا عايزة أفهمه! إزاي أبويا مضى تنازل وهو ميت؟ مين اللي مضى الورق ده؟ ومين اللي قرر إن بنته مالهاش حق حتى تسأل عن ثروته؟!

رفع فؤاد رأسه إليها، وقد تبدّلت ملامحه تمامًا :-

-  إنتِ مش فاهمة حجم المصيبة اللي بتعمليها!

-  لأ، أنا بدأت أفهم. وبدأت أفهم كمان ليه كنتوا مستعجلين تخلّصوا كل حاجة قبل ما أرجع.

ثم التفتت إلى مروان ، الذي وقف بينهما :-

-  وإنت بالذات، متحاولش تمثل دور المحايد. إنت كنت هنا طول الوقت. شفت كل حاجة، وسكت.

اشتدت عضلات فكه ورد عليها  :-

-  إنتِ متعرفيش أنا شفت إيه.... !

- ومش عايزة أعرف! أنا كل اللي عايزاه إنك تبعد عن طريقي.

حدق فيها طويلًا، ثم قال بصوت منخفض، لا يخلو من الغموض :-

-  صدقيني يا ليلى ، لو كنتِ تعرفي الحقيقة كاملة، كنتِ هتتمني إنك ما رجعتيش مصر أصلًا.

لوت شفتيها باستحقار  :-

-  ده تهديد جديد؟

- لأ. دي آخر فرصة ليكي عشان ترجعي من المكان اللي جيتي منه قبل ما تخسري أكتر.

اقتربت منه حتى أصبحت عيناها في مستوى عينيه :-

-  اسمعني كويس يا مروان  المنصوري. أنا خسرت أبويا، ودي خسارة عمري ما هعرف أعوضها. لكن حقي؟ حقي مش هخسره. ولو الدنيا كلها وقفت في وشي، هفضل أحارب لحد ما آخده.

ثم التفتت إلى عمها، والتقطت حقيبتها :-

-  الاجتماع ده انتهى بالنسبالي بس حسابنا لسه مخلصش

ثم سحبت المستند من يد مروان  ببرود: -

-  ومن اللحظة دي، محدش فيكم هيقدر يقنعني إن اللي حصل كان مجرد إجراءات قانونية.

استدارت نحو الباب، لكنها توقفت قبل أن تغادر :-

-  عندكم يومين. يا إما أعرف الحقيقة بنفسي، يا إما أخلي كل محامي ومساهم في المجموعة يعرف إن فيه تنازل باسم راجل مات قبل ما يتكتب التنازل ده.

اتجهت نحو الباب، غير أن صوت فؤاد أوقفها :-

-  لو خرجتي من هنا، متفكريش إنك هتقدري ترجعي تاني!

استدارت ليلى ، وابتسمت بثقة موجعة :-

-  أنا مش هرجع أطلب إذنك يا عمي. المرة الجاية، هرجع ومعايا حقي.

ثم غادرت  ظل مروان  واقفًا، وعيناه معلقتان بالباب المغلق ثم التفت إلى والده ببطء يقول بشك :-

- انا عاوز افهم ايه اللي بيحصل من ورايا ....!

اقترب فؤاد منه، وخفض صوته وهو ينكز صدره بأصبعه :-

-  اسمعني يا ابن ابوك، البنت دي رجعت عشان تخرّب العيلة وتقلّبها على بعضها، وأنا مش هسمح لها تعمل كده… وإنت كمان مش هتديها فرصة ، فاهمني... ؟

في الخارج، كانت ليلى تقف أمام سيارتها، تحاول السيطرة على ارتجاف أصابعها. أخرجت هاتفها، وفتحت رسالة وصلت إليها :-

- مروان كان آخر شخص شاف أبوكي قبل ما يموت… وكان الوحيد اللي معاه في اللحظات الأخيرة. اسأليه إيه اللي حصل في الليلة دي، وليه خرج منها عايش وساب أبوكي يموت.... !

توقفت أنفاس ليلى للحظة، وكأن الكلمات انتزعت الهواء من رئتيها.

أعادت قراءة الرسالة مرة أخرى، ثم ثالثة، وعيناها تتسعان مع كل كلمة، بينما أخذت أصابعها ترتجف حول الهاتف هامسة :-

- مروان......!